Cerramos

domingo, 21 de diciembre de 2014

PUBLICACIÓN DO LIBRO INFORME URXENTE SOBRE O CONXUNTO HISTÓRICO DE COMBARRO

PUBLICACIÓN DUN NOVO LIBRO DA ASOCIACIÓN A SOLAINA:
INFORME URXENTE SOBRE O CONXUNTO HISTÓRICO DE COMBARRO                   


A Asociación  A Solaina ven de publicar en forma de libro o INFORME URXENTE SOBRE O CONXUNTO HISTÓRICO DE COMBARRO, redactado neste 2014.

O libro titúlase INFORME URXENTE SOBRE O CONXUNTO HISTÓRICO DE COMBARRO, PROPOSTA DUN PLAN DE ACTUACIÓN EN DEZ MEDIDAS PARA CONSERVAR O PATRIMONIO DUN BEN DE INTERESE CULTURAL E TURÍSTICO, Pontevedra, Asociación A Solaina / Gráficas Anduriña, 2014, 55. paxs. ISBN: 84-617-0081-3.

O libriño está adicado "A Pascula Campos Michelena, arquitecta que desde 1983 fixo un extraordinario traballo profesional a favor da conservación do Conxunto Histórico de Combarro".

Trátase dunha publicación feita cunha curta edición. Os interesados en adquirila poden dirixirse á Asociación (asolainacombarro@gmail.com).


Portada do libro



A SOLAINA DIRÍXESE AO ALCALDE DE POIO SOLICITANDO UN PLAN DE MEDIDAS PARA COMBARRO, DESDE 2015

A ASOCIACIÓN A SOLAINA SOLICITA Á CORPORACIÓN MUNICIPAL DE POIO UN PLAN DE MEDIDAS PARA RECUPERAR COMBARRO, A APLICAR DESDE 2015


Este é o escrito que A Solaina rexistrou o 18 de decembro, no Concello de Poio, solicitando un Plan de Medidas para conservar e recuperar o Conxunto  Histórico de Combarro. Pídense, entre outras medidas, partidas concretas para a recuperación dos hórreos do pobo e o inicio da retirada dos cables do Conxunto Histórico en 2015. Solicitase así mesmo a creación dunha Comisión Municipal Especial, formada por representantes dos partidos con representación en Poio, para xestionar a colaboración da Deputación de Pontevedra e da Xunta de Galicia.

***


Combarro, 16 de decembro de 2014.
Sr. Alcalde Presidente do Excmo. Concello de Poio.
Sr. Alcalde:
Nos últimos anos como sabe fixéronse varios estudos sobre o Conxunto Histórico de Combarro (algún deles encargado polo Concello de Poio, en 2008), e a conmemoración en 2012 do 40 Aniversario da súa Declaración como Conxunto Histórico deixou así mesmo varias percepcións e diagnósticos sobre a situación actual. Esas diagnoses poñen de manifesto os activos ou puntos fortes de Combarro como conxunto patrimonial e turístico. Pero poñen así mesmo de manifesto algún dos problemas que afectan á conservación do patrimonio cultural de Combarro.
Eses diagnósticos están recollidos, como sabe, no "INFORME URXENTE SOBRE O CONXUNTO HISTÓRICO DE COMBARRO. PROPOSTA DUN PLAN DE ACTUACIÓN EN 10 MEDIDAS PARA CONSERVAR O SEU PATRIMONIO CULTURAL NO HORIZONTE DO 50 ANIVERSARIO DA SÚA DECLARACIÓN COMO CONXUNTO HISTÓRICO (1972-2022)", que elaboramos en 2014 nesta Asociación. O Informe foille presentado a vostede a aos portavoces dos grupos políticos representados na corporación municipal de Poio o 28 de abril de 2014.
            No libro recentemente publicado "Combarro, Conxunto Histórico (1972-2012). Estudos e Testemuños", o arquitecto Iago Seara, responsable da sección de Patrimonio Cultural do Consello da Cultura Galega e ex Director Xeral de Patrimonio da Xunta de Galicia, fala da:
 "formalización da destrución da memoria, do <<non lugar>> ao que chegou hoxe un Combarro que está moi distante dos valores que o fixeron merecedor de ser considerado Ben de Interese Cultural" (páx. 57).

Na mesma publicación, o arquitecto César Portela manifesta que:
"é unha pena que todo este legado histórico, este Patrimonio Arquitectónico, este tesouro, non o valoremos e o coidemos, non o respectemos como se merece e o sigamos afogando e danando con construcións recentes que evidencian algo que debería de avergonzarnos e é que poida dicirse que o tempo pasado foi mellor, polo menos en canto á Arquitectura se refire e ao caso que nos ocupa: a vila de Combarro" (páx. 62).

No mesmo libro, a socióloga Sara Mª Torres (coautora do Informe "Complementariedade comercio, hostalaría e turismo en Combarro") sostén que:
"é necesario buscar novas canles de concertación que resolva situacións de tensión derivadas da percepción dos residentes de que todo está orientado cara ó turismo e por ende, da falta de coordinación entre a vida urbana e a actividade turística. Ó respecto afondaría o fortalecemento de boas prácticas urbanas que se están a realizar de forma voluntaria, así como o consenso sobre aquelas outras a limitar, é dicir, o establecemento dun catálogo de ordenanzas e normas municipais negociadas de obrigado cumprimento. Resulta importante incidir sobre o mantemento e posta en valor do patrimonio e urbanismo tradicional como ben colectivo en lugar de  focalizalo unicamente como un eixo fundamental para potenciar o sector turístico. Tanto o empresariado local como os residentes deben ter acceso a participación cidadá, xa que conviven nun espazo de gran valor e reducidas dimensións." (páx. 46).

Trátase, como ve, de diagnoses e chamadas á actuación cualificadas, informadas e sensatas. Na Asociación A Solaina compartímolas plenamente. E entendemos que compre actuar, implicando a todas as administracións públicas de Galicia, empezando pola máis próxima é directamente afectada, que é o Concello de Poio que preside.
Por ese motivo, Sr. Alcalde, nos diriximos a esa corporación municipal de Poio, co fin de SOLICITAR unha serie de medidas a curto prazo, cun obxectivo e cun horizonte temporal máis amplo, que é o de conseguir que o Conxunto Histórico de Combarro se encontre en 2022 nunha situación mellor da que se encontra hoxe, desde o punto de vista patrimonial. Esas medidas que SOLICITAMOS son as seguintes:

1º.- Que a Corporación Municipal de Poio aprobe que se proceda á revisión e actualización do Plan Especial de Protección do Conxunto Histórico de Combarro (aprobado xa en 2001), de forma que se inicie a súa execución en 2015.

2º.- Que esa renovación vaia acompañada dunha enquisa aos veciños e veciñas Esta diagnose debería basearse nunha Enquisa á poboación de Combarro residente no Conxunto Histórico (a área do Plan Especial de Protección e a cualificada como "área de rehabilitación" o 30 de outubro de 2002), que valore a percepción, vivencia e opinión dos seus residentes e dos axentes directamente relacionadas con este, as súas necesidades e as súas aspiracións.

3º.- Que se aprobe, para 2015, un Plan de restauración urxente dos hórreos de Combarro. Suxerimos que sexa dotado de 15.000 euros.

4º.- Solicitamos que se cree unha concellería exclusiva de Patrimonio Cultural. A actual de Patrimonio Cultural e Festexos demostra unha estrutura disfuncional. Na práctica, nesta concellería foron máis importantes os festexos en Combarro que a salvagarda do patrimonio cultural do Conxunto Histórico.

5º.- Que se inicie en 2015 a eliminación do tendido aéreo de todo tipo cables en toda a área de protección do Conxunto Histórico e a definida como "área de rehabilitación" o 31 de outubro de 2002, de forma que se proceda ao seu soterramento nun prazo máximo de tres anos. Suxerimos que o Concello de Poio se poña en contacto co Sr. Conselleiro de Cultura para colaborar tecnicamente e lograr o financiamento conxunto deste proxecto. Na reunión que mantivemos algúns directivos de A Solaina con el en Santiago o 19 de maio de 2014, o Conselleiro comprometeuse a incluír este eliminación na axenda política da Consellería para 2015.

6º.- Que se poña en aplicación inmediata e efectiva algunhas das fundamentas recomendacións feita polo Seminario de Estudios socioeconómicos Carlos Velasco en 2008 no informe, encargado polo Concello de Poio, "Complementariedade comercio, hostalaría e turismo en Combarro", para lograr un turismo de calidade compatible coa conservación de patrimonio cultural e a calidade de vida dos veciños. De xeito moi particular, solicitamos que,  para 2015, se estableza un catálogo de ordenanzas e normas municipais que teñan como fin regular as actividades cotiás de particulares e negocios no Conxunto Histórico de Combarro, co obxectivo de ofrecer unha imaxe de calidade do mesmo, a través dun proceso de negociación cos axentes afectados.

7º. No aspecto da calidade, debemos transmitir que algúns dos paneis informativos no conxunto histórico teñen varias deficiencias nos textos, que conviña revisar. As máis salientables tópanse no que hai na praciña de A Rualeira. O texto en castelán ten graves erros gramaticais e de sintaxe, mesmo inclúe palabras que no existen en castelán. Solicitamos sexa retirado porque da unha pobre imaxe de Combarro e dos organismos que figuran no citado panel, incluído o Concello de Poio.

8º.- Que se aprobe iniciar as xestións para o Deseño e aplicación, nunha acción concertada do Concello de Poio, a Deputación Provincial de Pontevedra a través do padroado Rías Baixas, e de Turismo de Galicia, dun Plan Piloto de Excelencia Turística (Turismo cultural) para o Conxunto Histórico de Combarro. Unhas primeiras medidas, para 2015, poderían ser acordar cos particulares á rehabilitación de 2 muíños existentes no río da Sela, nas proximidades de Combarro, e aportar o local municipal, no espazo de Porto Deportivo, para crear nel un "Centro de Interpretación da Arquitectura Popular e do Medio litoral de Galicia", cunha especial atención ao conxunto histórico de Combarro e a illa de Tambo. Sobre Combarro e Tambo contamos na actualidade con solventes estudios universitarios que permiten informar os seus contidos de xeito altamente cualificado.

9º.- Suxerimos que se cree unha Comisión Municipal Especial, formada polos representantes dos tres grupos políticos con representación municipal, na que figure así mesmo o alcalde de Poio, para facer xestións ante a Deputación Provincial de Pontevedra e a Xunta de Galicia, con fin de conseguir a colaboración técnica e económica, para as seguintes medidas:
1) O Plan de restauración urxente dos hórreos de Combarro para 2015, ao tempo que se acorde un convenio que permita, en anos sucesivos, crear un Plan permanente de conservación e restauración de hórreos, de modo que en 2022 todos os hórreos de Combarro e as súas contornas inmediatas se encontren perfectamente restaurados e rehabilitados.
2) A eliminación do tendido aéreo de todo tipo cables en toda a área de protección do Conxunto Histórico e a definida como "área de rehabilitación", para a que existe un primeiro compromiso do Conselleiro de Cultura, co que esta Comisión podería entrevistarse.
3) Deseño e aplicación dun Plan Piloto de Excelencia Turística (cultural) para o Conxunto Histórico de Combarro, para o que debería levarse a cabo unha acción concertada do Concello de Poio, a Deputación de Pontevedra a través do Padroado Rías Baixas, e de Turismo de Galicia, e un financiamento proporcionado pola Deputación, a través do Padroado de turismo, e polo goberno de Galicia (Presidencia da Xunta), con cargo ao Plan Integral de Turismo de Galicia 2014-2016.




Presentación do Libro Combarro, Conxunto Histórico (1972-2012). Estudos e Testemuños

O venres 5 de decembro foi presentado pola Asociación A Solaina o libro Conxunto Histórico (1972-2012). Estudos e Testemuños.

A presentación tivo lugar no Salón de Actos da Comunidade de Montes de Combarro, ás 20 horas.

Na mesma participaron Ana Isabel Vázquez, deputada provincial de Cultura, en nome da Deputación de Pontevedra, o alcalde de Poio, Luciano Sobral, e Rafael Vallejo, pola asociación A Solaina, en calidade de coordinador da publicación.

Asistiron algo máis de cincoenta veciños e veciñas de Combarro. Foron agasalladas con cadanseu exemplar do libro.

Tamén estiveron presentes os representantes das asociacións de Combarro que colaboraron na publicación, así como as concelleiras de Poio Chelo Besada e Silvia Díaz, e o concelleiro ángel Moldes, que colaboran con senllos artigos nesta monografía. A bora contén artigos de Ramón Villares Paz, os arquitectos Iago Seara, César Portela, Manuel Caamaño Suárez, Manuel Mª Chaín e Manuel Pueyo, a socióloga Sara Torres, e os historiadores Felipe Senén López, José Mª. Folgar e Andrés Dacosta.

O libro está a venda en Combarro, na Librería Combarro, e en Pontevedra, nas librarías Metáfora (Rúa Bastida, 5) e Paz (Rúa da Peregrina, 29).

Público asistente á presentación do libro. Foto: Gustavo Santos (Faro de Vigo)

ASI RECOLLEU A PRENSA DIXITAL O ACTO

Faro de Vigo, 5 de decembro de 2014

Faro de Vigo, 6 de decembro de 2014: "Conocer, sensibilizar y llamar a la acción por Combarro"

Ana I. Vázquez e Rafael Vallejo. Foto Gustavo Santos (Faro de Vigo) 

lunes, 1 de diciembre de 2014

PRESENTACIÓN DO LIBRO COMBARRO, CONXUNTO HISTÓRICO (1972-2012). ESTUDOS E TESTEMUÑOS

Este próximo venres, 5 de decembro, ás 20 horas, terá lugar a  presentación do librov Combarro, Conxunto Histórico (1972-2012). Estudos e Testemuños, coordinado por Rafael Vallejo Pousada, presidente de A Solaina.

A presentación faráse no Salón de Actos da Comunidade de Montes de Combarro.

Gustaríanos contar coa vosa presencia na presentación.

As persoas que asistan serás agasalladas cun exemplar da publicación.





ÍNDICE DO LIBRO

COMBARRO, CONXUNTO HISTÓRICO (1972-2012).
ESTUDOS E TESTEMUÑOS
RAFAEL VALLEJO POUSADA (COORDINADOR)


Combarro, un dos emblemas do turismo das Rías Baixas
 Rafael Louzán Abal
Presidente da Deputación de Pontevedra.
A modo de introdución
Rafael Vallejo Pousada

CONMEMORACIÓN DO 40 ANIVERSARIO
Que conmemoramos neste 40 Aniversario?
Rafael Vallejo Pousada
Presidente da Asociación A Solaina de Combarro

Combarro, tamén Patrimonio Inmaterial
 Xosé-Enrique Costas González
Vicerreitor de Extensión Cultural da Universidade de Vigo

40 aniversario da declaración de Combarro como Conxunto Histórico
José Manuel Rey Pichel
Director xeral do Patrimonio Cultural

Combarro desde o Concello de Poio
Luciano Sobra( Fernández
Alcade do Concello de Poio

ESTUDOS

O PATRIMONIO CULTURAL DE GALICIA
O valor do Patrimonio no século XXI. Protección, conservación e acceso
Ramón Villares
Presidente do Consello da Cultura Galega

COMBARRO CONXUNTO HISTÓRICO
Combarro, Icona de Galicia na arte
Felipe-Senén López Gómez

Carlos Maside en Combarro, 1952
Rafael Vallejo Pousada e Andrés Dacosta Paz

Combarro no cinema
José Ma Folgar de la Calle

As posibilidades turísticas de Combarro: Patrimonio, hostalería e comercio
Sara M.a Torres Outón

Apuntamentos sobre as construcións mariñeiras da etapa preindustrial
Manuel Caamaño Suárez

O papel das Áreas de Rehabilitación Integral (ARIS) na rehabilitación sustentable dos Conxuntos Históricos: unha proposta para Combarro
Manuel Pueyo Vareta

O Plan Especial do Conxunto Histórico, un proxecto de arquitectura
Manuel M. Chaín Pérez

Combarro: Que facer? Como pensar?
lago Seara Morales

Combarro: unha simbiose mariñeira-campesiña
César Portela  

PARA COÑECER MÁIS ACERCA DE COMBARRO
Bibliografía sobre Combarro
Rafael Vallejo Pousada e Andrés Dacosta Paz



TESTEMUÑOS DESDE COMBARRO
Combarro.
Chelo Besada
Portavoz do Grupo Municipal do PSdG no Concello de Poio
Combarro no 40 aniversario como Conxunto Histórico
Silvia Díaz Iglesias
Portavoz do Grupo Municipal do BNG no concello de Poio
Combarro: un camiño para andar xuntos
Ángel Moldes
Portavoz do Grupo Municipal do PP no Concello de Poio
Ateneo Corredoira de Combarro
Juan M. Pérez González
Presidente
Coro Virxe da Renda de Combarro
Miguel A. Martínez Chapela
Director
Monte Veciñal en Man Común "Rega dos Agros" de Combarro
Claudio Quintillán Vallejo
Presidente da Comunidade de Montes
Agrupación de Mariscadoras a Pé da Confraría de San Telmo de Pontevedra
Marina Buceta Alonso
Presidenta
Asociación Cultural, Deportiva e Medioambiental Armadiña
Ramón García
Vicepresidente da ACDMA
O Porto deportivo de Combarro
Manuel Martínez Márquez
Responsable das instalacións náutico-deportivas Porto Deportivo de Combarro
AMECOMRA, máis de trinta anos ao servizo dos mexilloeiros de Combarro e Raxó
Manuel Ferreiro Barreiro
Presidente
Asociación para a Defensa e Promoción do Patrimonio Histórico Artístico de Combarro, A Solaina
Xosé Manuel Martínez González
Vicepresidente

ANEXO
Decreto de 30 de novembro de 1972 polo que se declara Combarro "Conjunto artístico y pintoresco de carácter nacional"




lunes, 4 de agosto de 2014

O TURISMO EN POIO: ARTIGO DE ANDRÉS DACOSTA

Andrés Dacosta, secretario de A Solaina, ven de editar un artigo en Faro de Vigo sobre a historia do turismo en Poio, no que pon de manifesto como xa en 1974 existe unha preocupación, a nivel provincial, sobre a calidade do turismo, e en particular sobre a convervación do patrimonio e da natureza, que en Pontevedra, serven de base ao turismo.

O turismo en Poio (I)


O turismo en Poio (II)

martes, 22 de julio de 2014

EN DEFENSA DOS XARDÍNS DE MONDARIZ BALNEARIO

EN DEFENSA DOS XARDÍNS DO GRAN HOTEL DE MONDARIZ BALNEARIO

A Asociación para a Defensa e Promoción do Patrimonio Histórico Artístico de Combarro, A Solaina, apoia a reivindicación de SOS Xardíns Mondariz Balneario, e de moitos galegos e galegas de ben, a favor de preservar os emblemáticos xardíns do Gran Hotel de Mondariz, patrimonio natural e cultural do noso país.
Mondariz-BalnearioMondariz-Balneario
ESCRITO QUE SE LLE REMITE Á ALCALDÍA DE MONDARIZ BALNEARIO.

SR. ALCALDE DO CONCELLO DE MONDARIZ-BALNEARIO.
Sr. Alcalde:
A Asociación para a Defensa e Promoción do Patrimonio Histórico Artístico de Combarro, A Solaina, valora con preocupación o convenio subscrito entre o Concello de Mondariz-Balneario e a empresa Sondeman SL para  recualificar os terreos dos  xardíns do Gran Hotel  coa finalidade de construír nese lugar ata catro edificios de vivendas.
Eses xardíns de Mondariz Balneario son un activo do patrimonio natural e cultural dese Concello e da Galicia singular, que se deben preservar. Forman parte dos signos de identidade que, como patrimonio cualificado, prestixian un lugar e son un factor de atracción ao mesmo. Son un capital cultural, que xeran calidade de vida e rendas para o conxunto da sociedade e para os particulares, no presente e no futuro.
Por ese motivo, esta Asociación súmase á campaña iniciada por SOS Xardíns Mondariz Balneario, e solicita do Concello de Mondariz Balneario, e dos poderes públicos de Galicia con competencias na materia, o seguinte:
  1. Que se deixe sen efecto o convenio subscrito entre o Concello de Mondariz-Balneario e a empresa Sondeman SL para  recualificar os terreos dos  xardíns do Gran Hotel con fins residencias e que, en calquera caso, non se modifique a normativa urbanística para permitir esa actuación inmobiliaria.
  2. Se adopten as medidas oportunas para a protección integral dos Xardíns do Gran Hotel, a través da figura correspondente da lexislación autonómica vixente nesta materia. É unha protección que merecen pola súa calidade de espazo natural e patrimonio cultural de Mondariz-Balneario e de Galicia.
Así o acorda a Xunta Directiva da Asociación A Solaina de Combarro en Combarro, a 18 de xullo de 2014.

miércoles, 9 de julio de 2014

O SEMINARIO "OS CONXUNTOS HISTÓRICOS NO BORDE MARÍTIMO GALEGO" CELEBROUSE 1 E 2 DE XULLO

O Seminario "Os conxuntos históricos no borde marítimo galego" celebrouse no Consello da Cultura Galega cunha notable asistencia de público


                    Rafael Vallejo e Iago Seara, no Seminario Conxuntos Históricos. Foto: Consello da Cultura Galega.

O 1 e 2 de xullo celebrouse o Seminario "Os conxuntos históricos no borde marítimo galego" no Consello da Cultura Galega. A matricula de 100 asistentes foi totalmente cuberta. O Seminario tivo así mesmo unha notable acollida nos medios de comunicación, galegos e españois.

As ponencias presentadas serán levadas a un documento, e es estudiadas no seo do Consello da Cultura, a fin de extraer recomendación que poídan servir criterios de aplicación xeral.

O Conxunto Histórico de Combarro tivo unha especial presenza no Seminario, durante a segunda xornada, ao que se lle dedicaron as ponencias do arquitectos Iagao Seara, da arquitecta Teresa Nieto, e de Rafael Vallejo, presidente da Asociación A Solaina, quen presentou o "Informe Urxente sobre o Conxunto Histórico de Combarro", elaborado no pasado mes de abril.

Muros, Cambados e Rinlo (Ribadeo) ocuparon así mesmo a atención dos especialistas e dos asistentes ao seminario, no que preocupou, de forma especial, os entornos dos conxuntos históricos, que hai que entender como unha paisaxe única a protexer, e a actuación das propias administracións no litoral, en especial a de Portos de Galicia. Estas intervencións derón lugar, na primeira década do século XXI, a recheos no mar desproporcionados, de grande impacto medioambiental, que casan mal, en moitos casos, coas escalas e as proporcións harmónicas dos conxuntos urbanos contruidos paseniñamente ao longo dos séculos.


AS CONFERENCIAS EN YOUTUBE
As conferencias pódense seguir no canal de youtube do propio Consello da Cultura. Aqui tendes os links:

1ª día. 1ª. Sesión:
Os conxuntos históricos no borde marítimo galego, 01-07-14, 1

1ª día. 2ª. Sesión:
Os conxuntos históricos no borde marítimo galego, 01-07-14, 3 

2ª día. 1ª. Sesión:
Os conxuntos históricos no borde marítimo galego, 02-07-14, 1

2ª día. 2ª Sesión e Debate final.
Os conxuntos históricos no borde marítimo galego, 02-07-14, 2 

ASÍ O RECOLLEU A PRENSA DIXITAL

FARO DE VIGO, 30-06-2014