Combarro. Arquitectura. Casa con sobrado.
No andar das casas con sobrado, que tradicionalmente teñen chan de madeira, atopamos a cociña, a sala, os cuartos e o balcón. A cociña tradicional acolle a lareira de pedra, onde se fai o lume e xeralmente o forno para cocer o pan. Tanto lareiras coma fornos estaban alimentadas coa leña recollida nos montes próximos, en boa parte comunais. O papel destes na vida das comunidades rurais galegas é transcendental, pois subministraban enerxía, madeiras para a construcción e diferentes esquilmos (toxo, muíña, follato), así como pastos para as ovellas e vacas, cuxa importancia apenas podemos hoxe imaxinar. Actualmente vivimos de costas aos montes nestes pobos litorais de Galicia. Sen eles, con todo, non teriamos chagado ata aquí. Nas cociñas de Combarro, as lareiras foron despois substituídas por cociñas de ferro, e estas, á súa vez, polas de butano desde os anos setenta.
Comentarios
Publicar un comentario