Cruceiro da Rúa.
Este cruceiro atópase na confluencia da Rúa e a rampla que sube do Peirao, punto cardinal da vida mariñeira de Combarro durante centos de anos e epicentro da orixe dos recursos económicos para o pagamento das rendas ao Mosteiro. No Peirao da Rúa foi onde o 23 de setembro de 1490 os mareantes de Combarro tomaron, probablemente, a decisión de asinar a Carta de Irmandade cos seus homónimos de Pontevedra, pola que serían recibidos como veciños da vila, quedando obrigados a furnir neste porto os seus cercos e vender e salgar as súas capturas.
Así nolo confirman varios foros. Un dos feitos en 1665 indica que: “Aforamos uno de los dos nuestros fumeiros que tenemos en el Puerto de Combarro, junto a la ribera del sitio en esta dicha feligresía, que está junto y pegado con otro del mismo convento”. Noutro alúdese á “Casa terreña, sita en el Puerto de Combarro, que siempre sirvió y al presente sirve de fumeiro, e se alla en el sitio de junto al peirao de dicho puerto”; e nun terceiro fálase da “Casa alta en el peirao, que fue fumeiro de salar sardiña este monasterio”.
·
"Os Cruceiros do Conxunto Histórico Artístico de Combarro", Andrés Dacosta Paz.
Foto: Cruceiro da Rúa. Asociación A Solaina.
·
Comentarios
Publicar un comentario